खादा एक पवित्र बस्त्र हो,

खादा वस्त्र के हो ? यसमा के लेखेको हुन्छ ?

खादा बौद्ध धर्मावलम्बीहरुले हरेक शुभ कार्यका साथै जन्म, छेवार, विवाह, मृत्यु जस्ता हरेक संस्कारमा उपयोग गरिने एक प्रकारको पबित्र वस्त्र हो । खादालाई भगवान गौतम बुद्धको न्हाम्सा अर्थात वस्त्रको रुपमा लिईन्छ । सामान्यतया खादामा सम्भोटा लिपीमा निम्न कुराहरु लेखिएको हुन्छ ।

“टाशी देलेक फुन्सुम छ्योक”-जसको अर्थ “सुख, शान्ति, शुभ, राम्रो कुराले सबै भरिपूर्ण होस्” भन्ने वाक्यंश लेखेको हुन्छ ।

त्यससँगै खादामा विभिन्न आशिषहरु पनि उल्लेख गरिएका हुन्छन् ।

“ङिन्मो देलेक छेन्देलेक, ङिम्हे घुङयाङ देलेग सिङ”-

जसको अर्थ दिनको शुभ, रातको शुभ, मध्य दिनको शुभ होस् ।

“ङिन्छेन् ताक्तु देलेगपा, कोन्छ्योग सुम्गी टाशी श्योग”-

जसको अर्थ दिन र रात सबै राम्रो भइ त्रिरत्नको शुभ रहोस् ।

“पोन्लोप मिडल ल्हेन्चीघ ढोघ, कुछे मिग्युर स्रा सिङ तेन्ङा, स्हाङ्से टोग्युन मिछेकी ला छ्योइफेल टाशी श्योग”

-जसको अर्थ गुरु (मन्त्री) मण्डल र हामी बीच केही गडबडी नभई सधै मित्रता र साथ रहिरहोस् । आयु र शरीर कहिल्यै नष्ट नहोस् । गाज बलियो एवम् अटल होस्, राम्रो होस् । हृदय देखि नै कर्म गर्न मन लागिरहोस् । अनन्त सम्म सुख, शान्ति, धर्म फैलिएर जाओस् ।

त्यसैगरी खादामा अष्ट मंगलमको चित्र पनि छापिएको हुन्छ ।

१. धुक (ह्रिन्छेन धुक) यसको अर्थ छाता अर्थात भगवानको छाता जो ज्ञानको सागर भएको ब्यक्तित्वलाई ओढाइने गर्दछ ।

२. माछा अर्थात सुनको माछा (सेर्गी ङ्या) यसको अर्थ शुभको प्रतीक हुन्छ ।

३. भुम्बा अर्थात कलश (घोइम्युङ) यसको अर्थ सम्पूर्ण इच्छा प्राप्ति हुने ।

४. कमल (इहोङ कमल) यसको अर्थ हृदय आनन्दित पार्ने ।

५. शङ्ख (ङ्यान्डक धुङ) यसको अर्थ शक्तिशाली श्रवण अर्थात धर्मको ध्वनी वा आवाज ।

६. स्वस्तिक चिन्ह (पल्बेहु) Never End Love अर्थात इच्छाएको प्राप्ति भएको, धेरै राम्रो ।

७. छाता, ओत, छाना (घ्याल्छेन) यसको अर्थ मानव जीवन कहिल्यै अन्त्य नहुने ।

८. धर्मचक्र÷खोर्लाे (वाङ्ग्युर) यसको अर्थ शक्ति फैलाउने ।

खादामा प्रयोग हुने पञ्चरङ्गको पनि छुट्टाछुट्टै अर्थ छ । जसको सामान्यतया निम्न अर्थहरु रहेको पाइन्छ ।

१. निलो = आकाश

२. पहेँलो = जमीन वा माटो

३. रातो = अग्नी

४. सेतो = बादल

५. हरियो = जङ्गल

खादा एक पवित्र बस्त्र हो, जो हरेक शुभ कार्य तथा अन्य सत्कारका कार्यक्रमहरुमा जुनसुकै वर्ग, समुदाय, धर्म, जातजातिहरुले प्रयोग गर्न सकिन्छ । किनभने खादामा कुनै धर्म वा समुदाय विशेषको वर्णन गरिएको नभई समग्र प्राणीको हितको लागि शुभ वाक्यांशहरु लेखिएको हुन्छ ।